ৰাসৰ লিমাৰিক-হৰিচন্দ্ৰ ডেকা

(১)

নলবাৰীৰ ৰাস প্ৰতি বছৰে চাওঁ

মূৰ্তিবোৰ চাই সঁচাকৈয়ে মজা পাওঁ

উজনিৰো ৰাস চাই

বৰ মজা লাগে পাই

গোপ গোপিনীৰ নৃত্য দেখি ভোল যাওঁ ৷

(২)

নলবাৰীৰ ৰাসত টিকট  নালাগে

থিয়েটাৰৰ কথা মই কৈছিলোঁ চাগে

থিয়েটাৰ যদি চাই

টিকট হ’লে নাপায়

নলবাৰীৰ মানুহে কাটে আগে ভাগে ৷

(৩)

উজনিৰ  ৰাসলৈ  যাবলৈ মন যায়

সেয়েহে বন্ধুবোৰৰ আছোঁ মুখ চাই

কোনেও একো নকয়

সেয়েহে মোৰ সংশয় 

এইবাৰো এনেকৈয়ে যাব নেকি ভাই ?

(৪)

উজনিৰ ৰাস সকলোৱে  ভাল পায়

মাজুলীৰ  ৰাসত সেয়ে  টিকট  নাই

কোনেও যদি নামাতে

ৰৈ  যাম  আদবাটতে

টিকত এটা নাপালে কি কৰিম যায় ?

(৫)

নলবাৰীৰ  ৰাসলৈ  ব্যাকুলতা দেখি 

কিদৰেনো নমতাকৈ থাকোঁ মই সখী

যদি আহে ৰাস চাব

ষ্টেজতেই মোক পাব

নহাকৈ নাথাকিব, নাহিলে হ’ম দুখী ৷

(৬)

নগাৱলৈ মাতিছে মোক ৰাস চাবলৈ

মোৰহে  সময়  নহ’ল  তালৈ যাবলৈ

নগাৱৰ ৰাসো পিছে

চাই বৰ মজা আছে

শইকীয়াই কৈছে তেওঁক লগ পাবলৈ ৷

(৭)

গড়মূৰ সত্ৰৰ ৰাসৰো নাম আছে

সন্দিকৈ কয় ল’ৰাই ছোৱালী হৈ নাচে

মতা মানুহ নে নাৰী 

চিনি পাবই নোৱাৰি

কিছুমানে ভুলতে ছোৱালী বুলি ফচে ৷

(৮)

দুলীয়াজানলৈ মাতি আছে কুমকুমে

তাৰ  ৰাসো নহয় কম কোনো গুণে

যদিহে  সময় পাওঁ

যাব পাৰোঁ নেকি চাওঁ

আপত্তি কৰোঁ যদিও কথা কোনে শুনে ?

(৯)

কল্যাণী,সুমিতা,সুনিতা আৰু হেমেন্দ্ৰ

ৰাসলৈ  নিমন্ত্ৰণ  দিলে আৰু গজেন্দ্ৰ

যদিও লাগে ভাগৰ

নেওচা নিদি আদৰ

যাম বুলি ভাবি আছোঁ  মই হৰিচন্দ্ৰ ৷

(১০)

গোলাঘাট, তেজপুৰ আৰু জামুগুৰি

একেলেথাৰি  আহিম ৰাসবোৰ ফুৰি

হাউলি হৈ নলবাৰী

এপাক আহিম ঘুৰি

বন্ধুবোৰে মাতি আছে  ৰাউচি জুৰি।

**********