সাক্ষাৎকাৰ

(অসমৰ এগৰাকী প্ৰখ্যাত শিশু সাহিত্যিক,লেখক,শিক্ষক,ডিব্ৰুগড় বিশ্ববিদ্যালয়ৰপৰা ডক্টৰেট ডিগ্ৰী প্ৰাপক,অসমীয়া গ্ৰন্থ জগতলৈ বহুকেইখন মূল্যবান গ্ৰন্থৰে বৰঙণি আগবঢ়োৱা শ্ৰদ্ধাৰ ড০ মৃদুস্মিতা ফুকনৰ সৈতে এটি সাক্ষাৎকাৰ।)

(সাক্ষাৎকাৰ গ্ৰহণৰ প্ৰাকমুহূৰ্ত্তত ড০ মৃদুস্মিতা ফুকন আৰু সমীৰণ শৰ্মা)

সমীৰণ শৰ্মা : বাইদেউ পোনতে আপুনি আমাৰ ফালৰপৰা নমস্কাৰ গ্ৰহণ কৰিব।

মৃদুস্মিতা ফুকন: নমস্কাৰ।

সমীৰণ শৰ্মা:  প্ৰথমে আমি আপোনাৰ জন্ম তথা পিতৃ- মাতৃৰ বিষয়ে কিছু কথা জানিব বিচাৰিছোঁ।

মৃদুস্মিতা ফুকন: মোৰ জন্ম যোৰহাটৰ নেহৰু পাৰ্কত। পিতৃ অধ্যাপক তৰুণ চন্দ্ৰ বৰুৱা আৰু মাতৃ বীণা বৰুৱা।

সমীৰণ শৰ্মা: শৈশৱত মৃদুস্মিতা ফুকন কেনেকুৱা আছিল? তাৰ লগতে আপোনাৰ শিক্ষা তথা স্কুলীয়া জীৱনৰ কিছু কথা জানিব বিচাৰিম।

মৃদুস্মিতা ফুকন: আন শিশুৰ দৰে মোৰ শৈশৱো অতি সাধাৰণভাৱেই পাৰ হৈছিল।যিহেতু আমি চহৰৰ মাজ মজিয়াত ডাঙৰ-দীঘল হৈছোঁ, সেয়ে ঘৰ, স্কুল, লগৰীয়া আৰু পৰিয়ালৰ লগতে মা, দেউতা, ককা, আইতা, খুৰা, খুৰীৰে ভৰা যৌথ পৰিয়াল এটাত পাৰ হৈছিল মোৰ শৈশৱ। প্ৰাথমিক শিক্ষা লাভ কৰিছিলো ৪নং ৱাৰ্ড প্ৰাইমাৰী স্কুলৰপৰা। তাৰ পাছত যোৰহাট চৰকাৰী উচ্চতৰ মাধ্যমিক আৰু বহুমুখী বালিকা বিদ্যালয়ত দ্বাদশ শ্ৰেণীলৈকে পঢ়োঁ। স্নাতক শ্ৰেণীৰ বাবে মই যোৰহাটৰে দেবীচৰণ বৰুৱা ছোৱালী মহাবিদ্যালয়ত ভৰ্তি হওঁ। তাৰ পাছত স্নাতকোত্তৰ শ্ৰেণী সম্পূৰ্ণ হয় ডিব্ৰুগড় বিশ্ববিদ্যালয়ত। তাত প্ৰাৰম্ভিক বৰ্ষৰ পৰীক্ষা দিয়াৰ পাছতেই মোৰ বিয়া হয়। সেয়ে দ্বিতীয় বৰ্ষৰ শ্ৰেণীসমূহত মই ছেগা-ছোৰোকাকৈহে  উপস্থিত আছিলোঁ। স্নাতকোত্তৰ চূড়ান্ত পৰীক্ষাত মই বিশ্ববিদ্যালয়ৰ দ্বিতীয় শ্ৰেণীৰ প্ৰথম স্থান লৈ উত্তীৰ্ণ হওঁ।

সমীৰণ শৰ্মা: আপুনি ডিব্ৰুগড় বিশ্ববিদ্যালয়ৰপৰা গৱেষণা কৰি সন্মানীয় ডক্টৰেট ডিগ্ৰীও লাভ কৰিছে। আপোনাৰ গৱেষণা গ্ৰন্থখনৰ বিষয়ে কিছু কথা জনাবচোন।

মৃদুস্মিতা ফুকন: মোৰ গৱেষণাৰ বিষয় আছিল –  ‘অসমীয়া লোকগীতত কৃষ্ণ’। মই ড° কৰবী ডেকা হাজৰিকাৰ অধীনত গৱেষণা কৰিছিলোঁ। গৱেষণা সংক্ৰান্তত অসমৰ বিভিন্ন ঠাইলৈ গৈ বিভিন্নজনৰপৰা তথ্য সংগ্ৰহ কৰিছিলোঁ। সেই কালছোৱাত মই যিহেতু চাহ বাগিচাৰ ভিতৰুৱা অঞ্চলত বাস কৰিছিলোঁ সেয়ে কোনো এখন কিতাপ বা কোনো এটা তথ্য সংগ্ৰহৰ বাবে যথেষ্ট আহুকাল হৈছিল। তদুপৰি তেতিয়া আজিৰ দৰে ইন্টাৰনেটতো নাছিলেই,ফটোষ্টেট আদিৰ সুবিধাও সুলভ নাছিল। সেয়ে মই মোৰ গৱেষণা পত্ৰখন (ছপা ১৭৬ পৃষ্ঠা) নিজ হাতেৰে লিখিহে জমা কৰিছিলোঁ। গৱেষণা – পত্ৰখন পৰীক্ষা কৰিছিল অসমৰ লোক সংস্কৃতিৰ সাধক ড°বীৰেন্দ্ৰ নাথ দত্তই।

এই গৱেষণা পত্ৰখন পাছত ( ২০০৯ চনত) পূৰ্বাঞ্চল প্ৰকাশনে প্ৰকাশ কৰে।

সমীৰণ শৰ্মা: আমাৰ প্ৰায় সকলোৰে জ্ঞাত যে আপোনাৰ পিতৃ তৰুণ চন্দ্ৰ বৰুৱা আছিল এগৰাকী বিখ্যাত অনুবাদক।তেখেতে জেমছ হিল্টনৰ বিখ্যাত উপন্যাস ‘Lost Horizon’ খন ’হেৰোৱা দিগন্ত’ নামেৰে অসমীয়ালৈ অনুবাদ কৰিছিল। কোনোবাখিনিত আপুনি তেখেতৰদ্বাৰা অনুপ্ৰাণিত হৈছিল নেকি?

মৃদুস্মিতা ফুকন: পিতৃৰদ্বাৰা নিশ্চয় অনুপ্ৰাণিত হৈছিলোঁ। কিন্তু  ‘হেৰোৱা দিগন্ত’ প্ৰকাশ হৈছিল মই নিচেই সৰু থাকোঁতেই আৰু  ”অঘৰী ল’ৰা’ তথা ‘ বান্ধোন সুলকি পৰে’ প্ৰকাশ হয় মোৰ বিয়াৰ পাছত।দুখ লাগে যে, মোৰ প্ৰকাশিত এখনো অনুবাদ গ্ৰন্থ তেখেতে দেখিবলৈ নাপালে।

সমীৰণ শৰ্মা: আপোনাৰ কৰ্মজীৱন তথা সাহিত্যিক কৰ্মৰাজীৰ বিষয়ে কিছু কথা জানিব বিচাৰিম।

মৃদুস্মিতা ফুকন: আগতেই কৈছোঁ, বিয়াৰ পাছত মই চাহ – বাগিচাৰ ভিতৰুৱা অঞ্চলত থাকিবলগীয়া হৈছিল। তথাপি এবাৰ সুযোগ পাই নতুনকৈ স্হাপিত হোৱা ৰঙাপাৰা কলেজত অধ্যাপনা কৰিছিলোঁ। কিন্তু সন্তান জন্ম হোৱাত সেই কাম এৰি দিব লগা হ’ল। তাৰ পাছত কিছুদিন গুৱাহাটীৰ পাব্লিক কলেজতো অধ্যাপনা কৰোঁ। গহপুৰৰ ওচৰত থাকোঁতে তাৰ ‘জ্ঞান ভাৰতী একাডেমী’তপ্ৰতিষ্ঠাপক অধ্যক্ষ হিচাপে সাতবছৰ আছিলোঁ। এতিয়া সাহিত্য কৰ্মৰ কথা কওঁ। স্কুলীয়া দিনৰেপৰা লিখা-মেলা কৰিছিলোঁ। বিশেষকৈ জীৱ-জন্তুৰ কথাবোৰ জানি মোৰ বৰ ভাল লাগিছিল। সেয়ে তেনে বিষয়ৰ কিছু কাহিনী গোটাই মই স্কুলত থকা দিনতে ‘বন বিৰিখৰ আঁৰে আঁৰে’ নাম দি কিতাপ এখন যুগুতাই উলিয়াইছিলোঁ। কিতাপখন প্ৰকাশ কৰিছিল  ‘অসম প্ৰকাশন পৰিষদে’। কিতাপখনৰ বাবদ পোৱা মাননিৰ চেকখন জমা কৰিবলৈকে মই প্ৰথম বেংকৰ একাউণ্ট এটা খুলিছিলোঁ। তাৰ পাছত এখন এখনকৈ বিভিন্ন বিষয়ৰ কিতাপ প্ৰকাশ হৈছে। মোৰ এই কিতাপবোৰ  প্ৰকাশৰ তাগিদা প্ৰধানকৈ পঢ়ুৱৈ আৰু প্ৰকাশক/ সম্পাদকৰপৰা অহা। লগতে অৱশ্যে মোৰ দুই ভাই-শান্তনু আৰু শাংকবৰ তাগিদাও আছে। বৰ্তমানলৈকে মোৰ ২৫ খন কিতাপ প্ৰকাশ হ’ ল।

সমীৰণ শৰ্মা: বাইদেউ গ্ৰন্থ একোখন ৰচনা তথা প্ৰকাশ কৰা অতি কষ্টসাধ্য আৰু মহান কাম।তেনে ক্ষেত্ৰত অসমীয়া গ্ৰন্থ জগতলৈ ২৫ খনকৈ গ্ৰন্থৰে মূল্যবান বৰঙণি আগবঢ়োৱা বাবে আপোনাক ধন্যবাদ জনাইছো।আপোনাৰপৰা এই ২৫ খন গ্ৰন্থৰ নাম জানিব বিচাৰিম।

মৃদুস্মিতা ফুকন: বন-বিৰিখৰ আঁৰে আঁৰে  (অসম প্ৰকাশন পৰিষদ, প্ৰথম প্ৰকাশ ১৯৮১),সংৰক্ষণ (আসাম ভেলী ৱাইল্ডলাইফ চছাইটি, ১৯৯৬),সময় বালিত সোণোৱালী খোজ (বালিমাহীপ্ৰকাশন,১৯৯৯) , লোকবন্ধু ডা: ভুৱনেশ্বৰ বৰুৱা (বালিমাহীপ্ৰকাশন,১৯৯৯), গ্ৰহ-তৰাৰ দেশত (বালিমাহীপ্ৰকাশন,২০০৩), ঋতু, ৰাজ আৰু আমি (আধাৰ,২০০৪), তিব্বতৰ এমুঠি তৰা (বনলতা,২০০৪), বন-বননিৰ আঁৰে আঁৰে (বনলতা,২০১০), নানা কথা: জনা-নজনা (বনলতা,২০১২), ৰং-বিৰঙৰ এমুঠি সাধু (জ্যোতি প্ৰকাশন, ২০১২), এজাক জোনাকীৰ জিলমিল (পাব্লিকেশ্বন আৰু, ২০১৬), সাধুকথাৰ ৰহঘৰা ( ৰেখা প্ৰকাশন, ২০২৩), গালিভাৰৰ গ্ৰমণ কাহিনী (শৰাইঘাট প্ৰকাশন, ২০০১), ৰবিন হুড (শৰাইঘাট প্ৰকাশন, ২০০২), তিনি মাস্কেটিয়াৰ (শৰাইঘাট প্ৰকাশন, ২০০৭),দীঘলা দেউতা (অৰুনোদই প্ৰকাশন, ২০১৭), মই তোমালোকৰ গান্ধীজী (অসম পাবলিচিং কোম্পানী, ২০১৯), আখলৰ জুতি-দেশ, বিদেশৰ (জ্যোতি প্ৰকাশন, প্ৰথম প্ৰকাশ ২০০৪), পৰিয়ালৰ প্ৰয়োজন (জ্যোতি প্ৰকাশন, প্ৰথম প্ৰকাশ ২০০৯), সন্তান সাৰথি (জ্যোতি প্ৰকাশন, ২০১৫), খাদ্যত স্বাস্থ্য, সৌন্দৰ্য আৰু সোৱাদ (জ্যোতি প্ৰকাশন, ২০১৬), মহাভাৰতৰ নাৰী (ইউনিকা প্ৰকাশন, ২০১০), চাৰ্লছ, ৰমাকান্ত, চামেলীহঁতৰ কথাৰে (সঞ্জীৱন প্ৰকাশন, ২০২৩), অসমীয়া লোকগীতত কৃষ্ণ (পূৰ্বাঞ্চল প্ৰকাশ, ২০০৯), উত্তৰ-পূৰ্বাঞ্চলৰ ভূগোল – (অসম বুক হাইভ, ২০২৩)

সমীৰণ শৰ্মা: প্ৰায়েই আমি আপোনাৰ লেখা ভিন্ন ধৰণৰ দৈনিক তথা সাপ্তাহিক বাতৰি কাকতত পঢ়িবলৈ পাওঁ।আপুনি এই দৈনিক তথা সাপ্তাহিক বাতৰি কাকতত লেখা মেলাৰ মাজত সীমাবদ্ধ নাথাকি শিশু আলোচনী মৌচাক, সঁফুৰা আদিতো শিশু উপযোগী লেখা লিখি আহিছে। এই সম্পৰ্কে আমাক অলপ জনাবচোন।

মৃদুস্মিতা ফুকন: আচলতে মই শিশুৰ মাজত থাকি, শিশুৰ বাবে লিখিয়েই ভাল পাওঁ (বৰ্তমানলৈকে মোৰ প্ৰকাশিত শিশু গ্ৰন্থ ১২খন)। সেয়ে আন কাকত-আলোচনীত লিখিলেও শিশুৰ বিষয়বোৰ মই এৰাই চলিব নোৱাৰোঁ।

সমীৰণ শৰ্মা: আমি আটাইয়েই জানো যে ৰন্ধন এক প্ৰকাৰৰ কলা।ৰন্ধন প্রকৰণৰ লগতো জড়িত গ্ৰন্থ আপুনি ৰচনা কৰিছে। তাত অকল থলুৱা ব্যঞ্জনৰ কথাই নাই, দেশ বিদেশৰ ভিন্ন ৰন্ধন প্ৰণালীৰ বিষয়ে আপুনি পাঠকৰ উপযোগীকৈ লিখিছে। আপুনি এই ভিন্ন ধৰণৰ ৰন্ধন প্ৰণালী ক’ত শিকিছে তথা বৰ্তমান আমাৰ সমাজত এগৰাকী নাৰীক স্বাৱলম্বী হোৱাৰ দিশত ৰন্ধনে কেনেদৰে সহায় কৰে আপোনাৰ পৰা অলপ জানিব বিচাৰিম।

মৃদুস্মিতা ফুকন: মই ৰন্ধা-বঢ়া কৰি ভাল পাওঁ। বিভিন্ন ৰন্ধন প্ৰণালীৰ প্ৰতি মোৰ আগ্ৰহ আছে। তেনেকৈয়ে পৰীক্ষামূলকভাৱে বিভিন্ন খাদ্য ৰন্ধাৰ সময়তে প্ৰকাশকৰপৰা তাগিদা পাই ‘আখলৰ জুতি – দেশ বিদেশৰ’ গ্ৰন্থখন যুগুতাই উলিয়াওঁ। উল্লেখযোগ্য যে ইউ টিউব, ইন্টাৰনেট আদি নথকাৰ দিনতে বিভিন্ন সূত্ৰৰপৰা মই বিভিন্ন দেশৰ ৰন্ধন প্ৰণালীসমূহ সংগ্ৰহ কৰিছিলোঁ। মোৰ বাবে অতি উৎসাহজনক কথা যে, গ্ৰন্থখনে যথেষ্ট আদৰ পাইছে আৰু ২০০৪ চনতে প্ৰথম প্ৰকাশ হোৱা এই গ্ৰন্থখনৰ ইতিমধ্যে ৪ৰ্থ  প্ৰকাশ পৰ্যন্ত  হৈ গৈছে।ৰন্ধনে এগৰাকী নাৰীক (আনকি পুৰুষকো) নিশ্চয়কৈ স্বাৱলম্বী কৰি তুলিব পাৰে। এই ক্ষেত্ৰত আমি নিতৌ আমাৰ ওচৰে-পাঁজৰে থকা মহিলাৰদ্বাৰা পৰিচালিত খাদ্য বিপনী, ঘৰুৱাকৈ বাণিজ্যিক ভিত্তিত মহিলাই ৰন্ধা খাদ্য, মহিলাৰদ্বাৰা পৰিবেশিত নানান ইউ টিউব, ব্লগ, ৱেবচাইত  আদি নিতৌ দেখিয়েই আছোঁ। ৰন্ধন বুলিয়েই নহয়, নিজৰ ৰাপ  থকা যিকোনো বিষয়েৰে নিজক স্বাৱলম্বী কৰিব পৰাটো বৰ সুখৰ কথা।

সমীৰণ শৰ্মা: সাহিত্যৰ পৃথিৱীখনৰ লগত জড়িত হোৱাৰ ওপৰিও আপুনি কুইজৰ পৃথিৱীখনৰ লগতো জড়িত।কুইজৰ লগত জড়িত হ’বলৈ অনুপ্ৰেৰণা লাভ কৰিছিল সেই বিষয়ে কিছু জানিব বিছাৰিছো।

মৃদুস্মিতা ফুকন: আগতেই কৈছোঁ, মই সদায় শিশুৰ সৈতে জড়িত হৈ থাকি ভাল পাওঁ। শিশুৰ বাবে লিখা মেলা কৰোঁতেই নানা তথ্যৰ সন্ধান পাওঁ। সমীৰণ, তোমাৰ প্ৰশ্নৰ উত্তৰ হিচাপে ক’ ব পাৰোঁ, শিশুৱেই মোৰ কুইজ-প্ৰীতিৰ বাবে অনুপ্ৰেৰণা। যিহেতু মোৰ অনুসন্ধিৎসু মন এটা আছে, সেয়ে তথ্যৰ সন্ধানতে মই কুইজৰ মাজত সোমাই পৰোঁ। যোৱা বহুবছৰ ধৰি মই যিহেতু’ সঁফুৰা ‘ৰ প্ৰশ্নোত্তৰ শিতানটো পৰিচালনা কৰি আছোঁ, তেতিয়াও মই তথ্য বিচাৰি ফুৰিছোঁ। ছাত্ৰ-ছাত্ৰীসকলেও মোৰ কুইজ যাত্ৰা সমৃদ্ধ কৰাত পৰোক্ষভাৱে সহায় কৰিছে। শেহতীয়াকৈ ‘উত্তৰ- পূৰ্বাঞ্চলৰ ভূগোল’  শীৰ্ষক প্ৰতিযোগিতামূলক পৰীক্ষাৰ উপযোগী বহু বিকল্পী প্ৰশ্নোত্তৰৰ কিতাপখন যুগুতোৱাৰ সময়ত স্বাভাৱিকতে মোৰ কুইজৰ ভাণ্ডাৰো যথেষ্ট পৰিমাণে চহকী হৈ উঠিল।

সমীৰণ শৰ্মা:  মননশীল সাহিত্য ৰচনাৰ বাবে আপুনি কেইবাটাও বঁটা লাভ কৰিছে। তাৰ বাবে আপোনালৈ অভিনন্দন। আপুনি ভাবে নে এটা বঁটাই সাহিত্যিক এজনৰ সমগ্ৰ সৃষ্টিৰাজি তথা সাহিত্যিকজনৰ জীৱনটোক এক বিশেষ মান্যতা প্ৰদান কৰে?

মৃদুস্মিতা ফুকন:  বঁটা বা পুৰস্কাৰে নহয়, এজন লেখকক প্ৰধানকৈ মান্যতা প্ৰদান কৰে পাঠক তথা অনুৰাগীসকলেহে। তথাপিও ক’ব লাগিব বঁটা বা পুৰস্কাৰ যেন লেখকজনৰ বাবে এক স্বীকৃতি, এক অতিৰিক্ত দায়িত্ব।

সমীৰণ শৰ্মা: অসমীয়া ভাষাৰ ক্ষেত্ৰত সময়ে সময়ে বিভিন্ন বিপৰ্যয় আহি পৰিছে।এনে বিপৰ্যয় ৰোধ কৰিবলৈ আমাৰ কৰণীয় কি বুলি আপুনি ভাবে?

মৃদুস্মিতা ফুকন: অসমীয়া ভাষাৰ ওপৰত আহি পৰা বিপৰ্যয়বোৰ ৰোধ কৰাৰ উপায় আমাৰ হাততে আছে। আমি পৃথিৱীৰ বিভিন্ন দেশৰ বুৰঞ্জীলৈ লক্ষ্য কৰিলে দেখিম, বহু দেশৰ ভাষা-সাহিত্যলৈ সময়ে সময়ে নানান বিপৰ্যয় আহি পৰিছে । কেতিয়াবা সেইবোৰক সময়ৰ বতাহে ছেদেলি ভেদেলি কৰি পেলাইছে বা কেতিয়াবা দেশৰ জনসাধাৰণে নিজে আগভাগ লৈ সেই বতাহক ভেটা দি নিজ ভেটিক, নিজ ভাষাক খামুচি ধৰি আছে । এই কথা ঠিক যে, ভাষা বোৱতী নদীৰ দৰে। ভাষালৈ পৰিবৰ্তন আহিবই। আহিবলৈ দিবও লাগিব। ৰবীন্দ্ৰনাথ ঠাকুৰে কোৱাৰ দৰে ‘ মিলিব লাগে, মিলাব লাগে।’ অন্যথা বন্ধ পানীৰ দৰে আৱদ্ধ হৈ থকা ভাষাৰ মৃত্যু অৱশ্যম্ভাৱী। দেৱভাষা সন্মানেৰে সন্মানিত সংস্কৃত ভাষাই তাৰ উদাহৰণ।

অৱশ্যে পৰিবৰ্তনৰ বতাহত ভাষাই যাতে স্বকীয়তা হেৰুৱাই নেপেলাই তাৰবাবে ভাষাপ্ৰেমী, ভাষাবিদ আৰু দেশপ্ৰেমী সকলো সজাগ, সচেষ্ট হ’ ব লাগিব। নতুন প্ৰজন্মক ভাষাটোৰ সঠিক ব্যৱহাৰৰ বাবে কেনেকৈ আগ্ৰহী কৰি তুলিব পৰা যায়, তাৰ প্ৰতি লক্ষ্য ৰাখিব লাগে। এই ক্ষেত্ৰত অৱশ্যেই প্ৰথম ভেটি হ’ ব নিজৰ ঘৰখন।

সমীৰণ শৰ্মা: ‘শব্দচিত্ৰ….জীৱনৰ কলাজ’ এটি অসমীয়া ভাষা-সাহিত্য চৰ্চাৰ গ্ৰুপ।এনেদৰে অসমীয়া ভাষা-সাহিত্য চৰ্চা কৰা ফেচবুক গ্ৰুপসমূহলৈ আপুনি কিবা বাৰ্তা দিব বিচাৰিব নেকি?এনে গ্ৰুপসমূহে অসমীয়া ভাষালৈ কিবা অৱদান আগবঢ়াব পাৰিছে অথবা পাৰিব বুলি আপুনি ভাবেনে?

মৃদুস্মিতা ফুকন: দৰাচলতে এতিয়া অসমীয়া সৃষ্টিশীল সাহিত্য বুলি ক’লে কেৱল ছপা আখৰত সৃষ্টি হোৱা সাহিত্যসমূহৰ কথা সামৰিলেই নহ’ব; ইন্টাৰনেট বা ছ’চিয়েল মিডিয়াত থকা এনে অসমীয়া সৃষ্টিশীল সাহিত্যসমূহেও অসমীয়া সাহিত্যৰ ভঁৰাললৈ অৰিহণা আগবঢ়াইছে৷

বিশেষকৈ বৰ্তমান ইন্টাৰনেট বা ছ’চিয়েল মিডিয়াযোগে চৰ্চিত ‘শব্দচিত্ৰ – জীৱনৰ কলাজ’ আদিৰ দৰে বিভিন্ন সাহিত্য গোট বা ইবিলাকৰ দ্বাৰা প্ৰকাশিত ই-আলোচনীসমূহেও অসমীয়া সাহিত্যৰ ই-জোনাকী যুগৰ প্ৰকৃত ধল বোৱাইছে বুলিব পাৰি৷

অৱশ্যে ইন্টাৰনেট বা ছ’চিয়েল মিডিয়াত প্ৰকাশ পোৱা সাহিত্যৰ সকলো যে গুণগত মান সাহিত্য বুলিবৰ যোগ্য, তেনে নহয়৷ তথাপি এই আপাহতে অধিকাংশই মাতৃভাষাত লিখা-পঢ়া কৰা কথাটো নিশ্চয়কৈ ভাষাটোৰ বাবে শুভ লক্ষণ৷ এনেকৈয়ে ইন্টাৰনেট বা ছ’চিয়েল মিডিয়া অসমীয়া সাহিত্যৰ প্ৰসাৰ-প্ৰচাৰ-চৰ্চাৰ এক বিশিষ্ট মাধ্যম হৈ উঠা দেখা গৈছে৷ 

এইদৰে দিনে দিনে জনপ্ৰিয় হ’বলৈ লোৱা ইন্টাৰনেট বা ছ’চিয়েল মিডিয়াত থকা ভাৰ্চুৱেল পৃথিৱীখনৰ অলেখ সৃষ্টিকো অসমীয়া সৃষ্টিশীল সাহিত্যৰ আলোচনাৰ আওতালৈ আনিবৰ হ’ল৷ তেহে অসমীয়া সৃষ্টিশীল সাহিত্যৰ পৰিধি চহকী হ’ব লগতে সেইসকল লেখকৰ সৃষ্টিয়ে যোগ্য সন্মান পাব৷

সমীৰণ শৰ্মা: আপোনাৰ বহুমূলীয়া সময় আমাক দিয়াৰ বাবে আপোনালৈ আন্তৰিকতাৰে ধন্যবাদ জ্ঞাপন কৰিলো।আপুনি সদায় কুশলে থাকক আৰু আপোনাৰ কৰ্মস্পৃহা সদায় অটুট থাকক। লগতে আপোনালৈ ৰঙালী বিহু তথা অসমীয়া নৱবৰ্ষৰ শুভেচ্ছা জনালোঁ।

মৃদুস্মিতা ফুকন: ধন্যবাদ সমীৰণ। তোমালৈও শুভকামনা থাকিল।

(সাক্ষাৎকাৰটি যুগুতাইছে সমীৰণ শৰ্মাই)

******