বোন্দা ককাইৰ বিয়া-জুৰি শৰ্মা

আঘোনমহীয়া ৰাতি বোন্দা ককাইৰ বিয়া 

চুৰুনী নিগনি কইনা হ’ব কেনে লাগিব মজা ৷

দৰাই পিন্ধে চুৰিয়া চেলেং ডিঙিত আৰে টিলিঙা

ভৰিত বুট চকুত বিট দেখাত লাগে বেঙা।

কইনাই পিন্ধে কুৰ্তা আৰু ৰঙীন দোপাত্তা

হাতত বালা, ভৰিত হাইহিল লাগে জোতা-পোটা ৷

নাকত ফুলি, গলত মণি আৰু কাণত কেৰু 

চোৱানা সখীসকল মোক কেনে লাগিছে বাৰু ৷

ৰাতি দুপৰত দৰা আহে মাদল বজাই বজাই

নিগনি কইনাক ধুনীয়াকৈ থৈছে সজাই পৰাই ৷

কঁঠালগুটিয়ানি ক’ৰবাৰপৰা আহিল ফোঁপাই -জোপাই 

ভিনিহিৰ ভৰি ধুৱাবলৈ পাই আনন্দৰ পাৰ নাই ৷

শহুৰে দৰাক আদৰি নি ৰভাতলিত বহায়

কন্যা সম্প্ৰদানত ডেকা চিকাই বৰ চাং ঢুকি পায় ৷

ডালশলীয়াই থাউকতে ঘৰুৱা সাজযোৰ সলাই 

আখৈ দিয়াৰ সাজযোৰ পিন্ধি ৰভাতলী শুৱায় ৷  

বোন্দাই হাঁহে গোফৰ তলে কইনাক দেখা পাই

পিছে মনে কৰে উচপিচ হাঁহ, পাৰ দেখা নাই ৷

বিয়া ঘৰত ভজা মাছৰ দৰাই গোন্ধ পাই 

জিভাৰ পানী ৰখাব নোৱাৰি সেপ ঢুকি পেলায় ৷

ৰভাৰ পৰাই মাৰিলে লৰ ঢপলিয়াই ঢপলিয়াই 

কইনাইও চেগতে আহিলগৈ মুখত এমুঠি ভৰাই ৷

লাই হালে জালে অ’ মন তৰা  

আবেলি বতাহে অ’ মন তৰা

লফা হালে জালে পাতে মন তৰা

বেঙা দৰাটো আহিল ক’ৰ পৰা ৷

উলু উলু লু লু……..

আয়তীৰ জোঁকাৰ আৰু জাত জাত বিয়া নাম

এনেহেন বিয়াখনি আৰু ক’তেনো পাম ৷ 

ভগা সবাহত উৰুলি দিলেহি ফেঁচা মাহী আহি

দৰা কইনাৰ কাণ্ড শুনি বোলে ত্ৰাহি ত্ৰাহি ৷

সুকলমে যেনিবা বিয়াখনি হৈ গ’ল

কইনা লৈ বৰযাত্ৰী ঘৰমুৱা হ’ল ৷

*******