শৰৎ আহিল চুচুক-চামাককৈ-হৰিচন্দ্ৰ ডেকা

শাৰদী ৰাণী মোৰ হিয়াৰ পদুম

নিৰলা কুটীৰৰ হেঁপাহ

চাৱনিত সৰে মেঘৰ দুন্দুভি

দুচকুত বিজুলীৰ চমক৷

নিকুঞ্জ বনত হেৰাল 

ডাৱৰৰ বাতৰি

সৰগত হেৰাল

তুমি অহাৰ বতৰা৷

উশাহ নিশাহৰ খলা-বমা,

মৃদঙ্গৰ অহিৰ ভৈৰৱ

এয়াও পিৰীতিৰ সৰগ

মোৰ বাৰমহীয়া শৰৎ

আকাশে-বতাহে

দেৱী নামি অহাৰ শঙ্খধ্বনি

ক’ত জানো হেৰাল সুৰভি!

সময়েও কৰে প্ৰতাৰণা,

শাৰদী ৰাণীৰ প্ৰেমিক যে আনমনা৷

এয়াও সময়ৰ গান

স্মৃতিয়ে বুজি নাপায় আন,

সুৰভিত বাজে  তোমাৰ জয়গান৷

*******